काठमाडौँ – नेपाली कांग्रेसको १५औँ महाधिवेशनमा कास्की क्षेत्र नं. २ का ८१ वर्षीय महाधिवेशन प्रतिनिधि शोभाचन्द्र बरालले पार्टीमा पुस्तान्तरण र नयाँ सोचसहितको नेतृत्व हस्तान्तरण आवश्यक रहेको बताएका छन्।

ज्येष्ठ प्रतिनिधिमध्येका एक बरालले अनुभवको सम्मान गर्दै युवा पुस्तालाई नेतृत्वको अवसर दिनुपर्नेमा जोड दिएका हुन्।

२००३ सालमा जन्मिएका पोखरा महानगरपालिका–७ मासबारका बरालले वडा सभापतिदेखि क्षेत्रीय सभापति हुँदै प्रजातान्त्रिक सेनानीको केन्द्रीय सदस्यसम्मको जिम्मेवारी सम्हालिसकेका छन्।

लामो राजनीतिक यात्रा तय गरेका बरालले बीपी कोइरालाको विचार र आदर्शलाई समयसापेक्ष परिमार्जन गर्दै अघि बढाउनुपर्ने धारणा राखेका छन्।

“समय बदलिएको छ, जनताका अपेक्षा फेरिएका छन् र देशले नयाँ सोच तथा कार्यशैली खोजिरहेको छ,” बरालले भने, “पुरानै ढर्राले अब राजनीति चल्न सक्दैन। युवाको जोस र ज्येष्ठ पुस्ताको अनुभवबीच समन्वय गरेर पार्टी अघि बढ्नुपर्छ।”

१२ वर्षकै उमेरमा वैवाहिक जीवनमा बाँधिएका बराल दुई पनातिसम्मको विस्तारित परिवारका ज्येष्ठ सदस्य हुन्।

व्यापार-व्यवसायसँगै लामो समय राजनीतिमा सक्रिय रहेका उनले नेतृत्वको बहस उमेरमा मात्र सीमित नभई अनुभवको सदुपयोग र नयाँ पुस्तालाई जिम्मेवारी दिने विषयमा केन्द्रित हुनुपर्ने बताएका छन्।