गोरखा – गोरखाको सिरिङ्गी हिमालमा गएको हिमपहिरोका कारण उइनगुलुङ खोला थुनिँदा बूढीगण्डकी नदीमा आएको बाढीले ६५ घर तथा छाप्रामा क्षति पुर्‍याएको छ। चुमनुब्री गाउँपालिका–६ स्थित लोक्पा र चुम्लिङको बीच भागमा रहेको हिमपहिरोपछि लेदोसहितको बाढी बूढीगण्डकीमा मिसिँदा तटीय क्षेत्रमा भौतिक क्षति पुगेको हो।

प्रहरीका अनुसार बाढीका कारण गाडी आवतजावत गर्न मिल्ने एउटा पक्की पुलसमेत भत्किएको छ। बाढी प्रभावित क्षेत्रबाट हालसम्म १८ जनाको सकुशल उद्धार गरिएको छ।

बाढीले ठूलो मात्रामा भौतिक संरचनामा क्षति पुर्‍याए पनि हालसम्म कुनै मानवीय वा चौपायाको क्षति नभएको सुरक्षा निकायले जनाएको छ। प्रभावित क्षेत्रमा उद्धार तथा राहतका लागि नेपाल प्रहरीसहितका सुरक्षाकर्मीहरू निरन्तर खटिरहेका छन्।