मेक्सिको सिटी– मेक्सिकोमा शुक्रबार एक पत्रकारको गोली हानी हत्या गरिएको छ । मानव अधिकारसम्बन्धी गैरसरकारी संस्था ‘आर्टिकल १९’ का अनुसार यस वर्ष देशमा हत्या गरिएका पत्रकारको सङ्ख्या नौ पुगेको छ ।

दक्षिणी राज्य ओआक्साकामा समाचार वेबसाइट ‘पिनोटेपा कोमुनिका’ का सञ्चालक ५२ वर्षीय हामुराबी हुएस्का मान्जानोको हत्या भएको हो । उक्त वेबसाइटका सामाजिक सञ्जालमा ५२ हजारभन्दा बढी फलोअर्स छन् ।

राज्यका अभियोजकका अनुसार एक सशस्त्र समूहले हुएस्का मान्जानो र अन्य दुई जनामाथि गोली प्रहार गरेको थियो । आक्रमणमा गम्भीर घाइते भएका मान्जानोको मृत्यु भएको हो ।

उनले सञ्चालन गरेको वेबसाइटले उनी बसोबास गर्ने सहर सान्टियागो पिनोटेपा नासिओनालका राजनीतिक तथा स्थानीय विषयमा समाचार प्रकाशन गर्दै आएको थियो । पत्रकारितासँगै उनी ट्याक्सी चालकका रूपमा पनि काम गर्थे ।

मानव अधिकार संस्था ‘आर्टिकल १९’ ले घटनाको अनुसन्धान गर्दा मान्जानोको पत्रकारितासम्बन्धी कामलाई प्राथमिकतामा राख्न अभियोजकको कार्यालयसँग माग गरेको छ । संस्थाले सामाजिक सञ्जाल एक्समार्फत पत्रकारको हत्याको निष्पक्ष अनुसन्धान गर्न पनि आग्रह गरेको छ ।

पत्रकारको सुरक्षा र प्रेस स्वतन्त्रताका दृष्टिले मेक्सिको विश्वकै जोखिमपूर्ण देशमध्ये एक मानिन्छ । ‘रिपोर्टर्स विदाउट बोर्डर्स’ का अनुसार सन् १९९४ यता मेक्सिकोमा १५० भन्दा बढी सञ्चारकर्मीको हत्या भइसकेको छ ।

पत्रकारमाथि हुने हिंसा र हत्याका घटनाले मेक्सिकोमा स्वतन्त्र पत्रकारिता तथा स्थानीय मुद्दाको समाचार सङ्कलनमा गम्भीर चुनौती खडा गर्दै आएका छन् ।