चितवन- धादिङको गजुरी गाउँपालिका–५ गलौँदीमा सडक भासिएर पृथ्वी राजमार्ग अवरुद्ध भएपछि काठमाडौँतर्फ खाद्यान्न बोकेर हिँडेका मालवाहक गाडी र यात्रुवाहक बस अलपत्र परेका छन् । राजमार्ग अवरुद्ध हुँदा चालक तथा सहचालकहरू भरतपुरको केन्द्रीय बसपार्क अगाडिको मुख्य सडकमै खाना पकाएर बस्न र रात बिताउन बाध्य भएका छन् ।

बडादसैँ नजिकिँदै गर्दा चामललगायत अत्यावश्यक खाद्य सामग्री बोकेका गाडी लामो समयदेखि रोकिएका छन् । भरतपुरको मुख्य सडकमा मालवाहक गाडीको लामो लस्कर लागेको छ ।

शुक्रबार रातिदेखि रोकिएका चालक विशाल राजपुतका अनुसार सडक अवरुद्ध हुँदा खाद्यान्न समयमै गन्तव्यमा पुर्‍याउन समस्या भएको छ । चालक तथा सहचालकले सडकछेउमै चुल्हो बालेर खाना पकाउने र रात बिताउने गरेका छन् ।

‘हामीलाई दसैँ र चाडपर्व भनेको केही हुँदैन । यसरी बाटोमा अलपत्र पर्दा महँगो खर्च, खानेकुराको जोहो र सार्वजनिक शौचालयको अभावले सबैभन्दा ठूलो सास्ती हुन्छ,’ राजपुतले भने । उनले नजिकैको धाराबाट पानी ल्याएर सडकमा खाना पकाएर खाने गरेको बताए ।

यसअघि पनि काठमाडौँतर्फ जाँदा कृष्णभीरलगायत स्थानमा लामो समयसम्म अलपत्र पर्नुपरेको स्मरण गर्दै उनले अवरुद्ध राजमार्ग चाँडै सञ्चालनमा आउने अपेक्षा व्यक्त गरे । चाडपर्वका लागि खाद्यान्न समयमै गन्तव्यमा पुर्‍याउने र दसैँअघि परिवारसँग भेटघाट गर्ने चालकहरूको चाहना छ ।

राजमार्ग अवरुद्ध हुँदा चितवन र धादिङ हुँदै काठमाडौँ जाने यात्रु पनि प्रभावित भएका छन् । भरतपुर बसपार्कमा अलपत्र परेका यात्रुलाई ट्राफिक प्रहरीले हेटौँडाको वैकल्पिक मार्ग प्रयोग गरी गन्तव्यतर्फ जान सहजीकरण गरेको छ । प्रहरीले यात्रुले तिरेको भाडा फिर्ता गराउने व्यवस्था मिलाउँदै उनीहरूलाई वैकल्पिक मार्गबाट पठाएको छ ।

नागढुंगा–मुग्लिन सडक योजना, पूर्वी खण्डका इन्जिनियर राजीव मानन्धरका अनुसार गजुरीबाट काठमाडौँतर्फ करिब पाँच किलोमिटरको दूरीमा रहेको गलौँदीमा ७० मिटर लम्बाइ र चार मिटर चौडाइको सडक भासिएको छ ।

सडकको भित्तासम्मै चिरा परेकाले तत्काल मर्मत गरी राजमार्ग सञ्चालनमा ल्याउन पाँच वटा एक्साभेटर, दुई वटा लोडर र छ वटा टिप्पर प्रयोग गरेर ब्याक कटिङको काम भइरहेको उनले बताए । राजमार्गमाथि गाउँ जाने शाखा सडक रहेकाले सबै भित्ता काट्न सम्भव नभएको उनको भनाइ छ ।

शनिबार साँझसम्म राजमार्ग एकतर्फी रूपमा सञ्चालनमा ल्याउने लक्ष्यसहित काम भइरहेको मानन्धरले जानकारी दिए ।