काठमाडौं– नेपाली कांग्रेसका महामन्त्रीका उम्मेदवार प्रदीप पौडेलले नवनिर्वाचित सभापति गगनकुमार थापालाई बधाई दिँदै पार्टीलाई नयाँ उचाइमा पुर्‍याउने जिम्मेवारी पूरा गर्नुपर्ने बताएका छन् ।

१५औँ महाधिवेशनबाट अत्यधिक मतसहित सभापतिमा निर्वाचित भएपछि थापालाई बधाई दिँदै पौडेलले कांग्रेसको परिवर्तनलाई देशको परिवर्तनसँग जोड्नुपर्ने बताएका हुन् ।

शनिबार सामाजिक सञ्जाल फेसबुकमार्फत शुभकामना दिँदै पौडेलले कांग्रेसलाई नयाँ उचाइमा पुर्‍याउने ऐतिहासिक अभिभाराको नेतृत्व प्राप्त गरेकोमा थापालाई बधाई दिएका छन् ।

‘हामी युग बदल्ने संकल्प लिएर आएका छौँ । बाटो पक्कै सजिलो छैन,’ पौडेलले लेखेका छन्, ‘चुनौतीका पहाडहरू थुप्रै छन् । तर, हामीसँग अलमलिने र थाक्ने कुनै छुट छैन ।’

उनले बदलिएको कांग्रेस र बदलिने देश आफूहरूको कर्म र परिणाम बन्नुपर्ने उल्लेख गर्दै पार्टी रूपान्तरणको यात्रामा इमानदार सहयात्रीका रूपमा सँगै रहने प्रतिबद्धता पनि व्यक्त गरेका छन् ।

‘बदलिएको कांग्रेस, बदलिने देश हाम्रो कर्म र परिणाम बन्नुपर्छ,’ पौडेलले लेखेका छन्, ‘इमानदार सहयात्रीको रूपमा हामी सँगै हुनेछौँ ।’

कांग्रेसको १५औँ महाधिवेशनबाट थापा सभापतिमा निर्वाचित भएपछि पौडेलको यो सन्देशलाई पार्टी रूपान्तरण र नयाँ नेतृत्वको कार्यदिशाप्रतिको प्रतिबद्धताका रूपमा हेरिएको छ ।