काठमाडौं- नेपाली कांग्रेसका सभापतिका उम्मेदवार गगन थापाले आफ्नो नाम जोडेर विभिन्न उम्मेदवारको सूची प्रचार गरिएकोप्रति आपत्ति जनाएका छन् ।

सामाजिक सञ्जालमार्फत आफ्नो धारणा सार्वजनिक गर्दै थापाले आफ्नो नामसँग जोडेर प्रचार गरिएका कुनै पनि उम्मेदवारको सूचीलाई आधिकारिक समर्थन वा सिफारिसका रूपमा नबुझ्न आग्रह गरेका हुन् ।

नेपाली कांग्रेसको १५औँ महाधिवेशनअन्तर्गत केन्द्रीय कार्यसमिति चयनका लागि मतदान प्रक्रिया सुरु भएको उल्लेख गर्दै उनले निर्वाचन एक दिन ढिलो हुँदा महाधिवेशन प्रतिनिधिमा परेको असुविधाप्रति क्षमासमेत मागेका छन् ।

‘यो पार्टीभित्रको स्वस्थ आन्तरिक लोकतान्त्रिक प्रक्रिया हो । यसपटक कुनै पनि प्यानल वा गुट छैन’, थापाले लेखेका छन् ।

उनले कुनै पनि अफवाहमा नलाग्न र भ्रममा नपरी आफ्नो स्वतन्त्र विवेक, मूल्याङ्कन तथा विश्वासका आधारमा मतदान गर्न महाधिवेशन प्रतिनिधिलाई आग्रह गरेका छन् ।

पार्टीको सर्वोपरि हितलाई ध्यानमा राखेर प्रतिनिधिले गर्ने विवेकपूर्ण निर्णयले संगठनलाई नयाँ उचाइमा पुर्‍याउने विश्वाससमेत उनले व्यक्त गरेका छन् ।