काठमाडौं- भारतमा निर्वाचन आयोगले सञ्चालन गरेको एसआईआरको मुद्दालाई लिएर विपक्षी दलका नेताहरुले लगातार प्रदर्शन गरिरहेका छन् । विपक्षी नेताहरूको प्रदर्शनलाई सत्तारुढ भारतीय जनता पार्टी भाजपाले विपक्षी नेता राहुल गान्धीमाथि देशमा अराजकता फैलाउन खोजेको आरोप लगाएको छ ।

बिहीबार आयोजित पत्रकार सम्मेलनमा भाजपा नेता प्रदीप भण्डारीले राहुल गान्धीलाई प्रश्न गर्दै अदालतमा विचाराधीन विषयलाई लिएर सडकमा माहोल बनाउन खोज्नुले उनको मुद्दा नै कमजोर रहेको पुष्टि गर्ने दाबी गरे । भण्डारीले ४० भन्दा बढी पूर्व न्यायाधीशहरूले पत्र लेखिसकेको प्रसङ्ग उल्लेख गर्दै राहुल गान्धीलाई देशको सर्वोच्च अदालतप्रति विश्वास छ कि छैन भनी प्रश्न समेत गरे ।

प्रदर्शन र धर्नाका नाममा अराजकता सिर्जना गर्न खोजिएको टिप्पणी गर्दै भाजपाले कांग्रेसप्रति जनतामा अविश्वास अझै बढेर गएको टिप्पणी गरेको छ । अदालतमा विचाराधीन मुद्दाबारे सडकबाट फैसला खोज्नु गैरसंवैधानिक र अपराधजन्य कार्य भएको भाजपाको ठहर छ ।