काठमाडौं– जिल्ला प्रहरी कार्यालय बागलुङले चाडपर्वका बेलामा हुनसक्ने ठगी, चोरी–डकैती तथा सम्भावित घटना लक्षित गस्ती सुरू गरेको छ । पल्सर, बुलेट, एफ–जेट, डियोलगायत ब्राण्डका मोटरसाइकल–स्कुटर गस्तीमा प्रयोग भएका छन् ।

पिकेट ड्युटी, पैदल गस्ती, मोबाइल गस्ती, मोटरसाइकल गस्ती थालिएको छ भने कालोबजारी नियन्त्रण गर्न पनि प्रहरी परिचालन गरिएको छ ।  

चाडपर्व सुरक्षा योजनाअन्तर्गत जिल्ला प्रहरी कार्यालय तथा मातहतका प्रहरी चौकीबाट ४ सय ३३ जना प्रहरी परिचालन गरिएको जिल्ला प्रहरी कार्यालय बागलुङका प्रमुख एसपी फणिन्द्र प्रसाईंले बताए । प्रहरीले बागलुङ बजारमा ५१, गलकोट बजारमा ४४, बुर्तिबाङ बजारमा १२ गरेर १०७ वटा सीसीटिभीबाट निरन्तर निगरानी गर्ने उनको भनाइ छ ।

यात्रुको सहजताका लागि बागलुङ जिल्ला प्रवेशद्वार मालढुंगा, बागलुङ बजार, हटिया र बुर्तिबाङ बजारमा यात्रु सहायता कक्षसमेत स्थापना गरिएको छ ।

तस्बिर : डम्मर बुढामगर/नेपाल फोटो लाइब्रेरी