काठमाडाैँ – नजिकिँदो चाडपर्वको मौका छोपेर हवाई भाडादर अत्यधिक बढाएको गुनासो बढेपछि सरकारले यसमा चासो देखाएको छ।

प्रधानमन्त्री वालेन्द्र शाह (बालेन) को निर्देशन र संस्कृति, पर्यटन तथा नागरिक उड्डयनमन्त्री खडकराज पौडेल (गनेस) को सक्रियतामा नागरिकको गुनासो सम्बोधन गर्न नेपाल नागरिक उड्डयन प्राधिकरण (क्यान) ले आन्तरिक वायुसेवा कम्पनीका पदाधिकारी तथा प्रतिनिधिहरूसँग छलफल गरेको छ।

क्यानमा आयोजित उक्त छलफलमा क्यानका पदाधिकारी र आन्तरिक वायुसेवा कम्पनीका प्रतिनिधिबीच चाडपर्वका बेला स्वीकृत भाडादरभन्दा सस्तोमा टिकट बिक्री वितरण गर्ने र गराउने सहमति भएको छ। साथै, सोही भाडादरबारेको स्पष्ट सूचना सम्बन्धित वायुसेवा कम्पनीका सबै बिक्री वितरण प्लेटफर्महरूमा प्रकाशन गर्ने निर्णयसमेत भएको छ।

यसअघि विसं २०७२ मङ्सिर २७ गते तत्कालीनमन्त्रीस्तरीय निर्णयअनुसार आन्तरिक हवाई सेवाको न्यूनतमदेखि उच्चतम भाडादर निर्धारण गरिएको थियो।

सोही निर्धारित मापदण्ड र स्वीकृत सीमाभित्र रहेर मात्र भाडा लिनुपर्नेमा पछिल्लो समय मनपरी ढङ्गले भाडा असुलेको गुनासो आएपछि नियामक निकायले यसलाई कडाइ गरेको हो।