काठमाडौं– नेपाली कांग्रेसको १५औँ महाधिवेशनमा महामन्त्रीका आकांक्षी मीन विश्वकर्माले कुनै पनि पदमा उम्मेदवारी दिएका छैनन्। सभापति गगन थापासँगको परामर्शपछि उनले उम्मेदवारी नदिने निर्णय गरेको बताइएको छ।

विश्वकर्मा स्वयंले पनि सभापति थापासँगको छलफलपछि उम्मेदवारी नदिने निर्णय गरेको बताएका छन्। उनलाई थापाले मनोनित कोटाबाट सहमहामन्त्री बनाउने तयारी गरेको चर्चा कांग्रेसभित्र चलिरहेको छ।

तर, यसबारे प्रश्न गर्दा विश्वकर्माले स्पष्ट जवाफ दिएनन्। उनले भने, ‘सभापतिज्यूसँग परामर्शमै मैले कतै पनि उम्मेदवारी नदिएको हो। अरू विषयमा छलफल हुन बाँकी छ। सभापति र मेरो बीचमा अहिले कांग्रेसको १५औँ महाधिवेशन सफल बनाउने र अरू कुराहरू पछि गर्दै जाने विषयमा कुराकानी भएको छ।’

मीन विश्वकर्मा केही साताअघि मात्रै गगन थापा नेतृत्वको समूहमा आएका हुन्। उनी यसअघि शेरबहादुर देउवा पक्षका प्रभावशाली नेताका रूपमा चिनिन्थे।

महामन्त्रीमा आकांक्षी भए पनि उम्मेदवारी नदिएका विश्वकर्मा १५औँ महाधिवेशनमा भने सक्रिय रूपमा खटिएका छन्।

विश्वकर्माले उम्मेदवारी नदिएपछि उनलाई थापाले मनोनित कोटाबाट सहमहामन्त्री बनाउने तयारी गरेको चर्चा चलेको हो। सहमहामन्त्रीको जिम्मेवारी नदिए पनि केन्द्रीय सदस्य बनाउने सम्भावना रहेको कांग्रेस वृत्तमा चर्चा छ।