काठमाडौँ – पूर्वराष्ट्रपति विद्यादेवी भण्डारी नेकपा एमालेको सचिवालय बैठकमा सहभागी हुने भएकी छन्।

एमाले सचिवालयको आज बसेको बैठकले भण्डारीलाई अध्यक्ष केपी शर्मा ओलीपछिको दोस्रो वरीयता प्रदान गर्दै आगामी सचिवालय बैठकदेखि सहभागी हुन पाउने व्यवस्था गरेको हो।

एमालेले केही दिनअघि जारी गरेको अन्तरपार्टी निर्देशन (अपानि) मा भण्डारीलाई अध्यक्षपछिको दोस्रो वरीयतामा रहने व्यवस्था गरिएको थियो। सोहीअनुसार उनलाई पार्टीका केन्द्रीय कमिटी, पोलिटब्युरोलगायत बैठकमा सहभागी हुने अधिकारसमेत दिइएको छ।

भण्डारी वरिष्ठ नेताको हैसियतमा अब एमाले सचिवालय बैठकमा सहभागी हुनेछिन्। यससँगै एमालेको सचिवालयमा दुई जना महिला नेतृ हुने भएका छन्। यसअघि सचिवालयमा पद्मा अर्याल महिला नेतृका रूपमा रहेकी छन्।

पूर्वराष्ट्रपति भण्डारी यसअघि एमालेको केन्द्रीय सदस्य तथा पोलिटब्युरो सदस्यसमेत रहिसकेकी छन्।