काठमाडौं – गएको शुक्रवारदेखि प्रदर्शनमा आएको फिल्म ‘चच हुई’ मा आर्यन सिग्देलको शीर्ष भूमिका छ । यो फिल्मको बक्स अफिसमा खासै सुखद ओपनिङ भएन । यद्यपि आर्यनको अभिनयको भने तारिफ भयो ।

फिल्ममा आर्यनले बुबाको खोजीमा रहेका एक युवकको भूमिका निभाएका छन् । उनलाई भोलाराज सापकोटाले मिल्ने साथी बनेर पर्दामा साथ दिएका छन् ।

फिल्ममा अभिनय राम्रै गरे पनि आर्यनको खासै चर्चा छैन । साम्तेन भुटियाले निर्देशन गरेका कारण पनि फिल्म अझ स्तरीय बन्ने धेरैको अनुमान थियो । तर, फिल्म औसत प्रतिक्रियामा थन्कियो ।

आर्यनले भने फिल्मले भन्दा पनि चरित्रले कलाकारलाई जीवन दिने बताए । साथै उनले हिन्दी फिल्म ‘पद्मावत’ मा रणवीर सिंहको चरित्रको उदाहरण दिए ।

‘रणवीर सिंहले अरु पनि फिल्ममा काम गरेका थिए नि, तर जब पद्मावत रिलिज भयो, त्यसपछि उनको अभिनय खारिएको देखियो,’ आर्यनले अगाडि थपे, ‘किनकि, उनले त्यही अनुसारको चरित्र पाए ।’

आर्यनले आफूले यदि चरित्र फरक पाएको खण्डमा कलाकारले सहजै अभिनय गर्न सक्ने बताए । उनले भने, ‘अभिनय गर्न त जुन कलाकारले पनि सक्छ नि, कलाकारले चरित्र कस्तो पाउँछ भन्ने हो ।’

त्यसो त नेपालमा चरित्रलाई ख्याल गरेर खासै फिल्म बनाएको पाइँदैन । कलाकार प्रायः उही परिवेशमा बाँचेको फिल्ममा देखाइएको हुन्छ । आर्यन पनि उस्तै खालको चरित्रमा अभिनय गर्दै आएका छन् ।

यतिबेला भने आर्यनले दमदार चरित्रको प्रतीक्षा गरेका छन् । कुनै बेला फिल्म उद्योगमा एकपछि अर्को गर्दै हिट फिल्म दिएका आर्यन पछिल्लो समय भने खासै जम्न सकेका छैनन् ।

यसअघि उनको शीर्ष भूमिका रहेको फिल्म ‘हजार जुनीसम्म’ पनि व्यावसायिक रुपमा असफल रहेको थियो ।