काठमाडौं- पूर्वप्रधानमन्त्री बाबुराम भट्टराईले आफूहरुको पुस्ता राजनीतिक नेतृत्वबाट बिदा भएर नयाँलाई मौका दिनुपर्ने बताएका छन् । नेपाली कांग्रेसको महाधिवेशनमा पुगेर अर्थ राजनीतिको गहिलो विश्लेषण गरेका भट्टराईले नयाँ पुस्ताको आवाजलाई उठाउन नसकेकै कारण नेपालमा गतवर्ष जेन-जी आन्दोलन भएको बताए ।

उनले राजनीतिक विश्लेषण गर्दै प्रत्यक्ष कार्यकारी निर्वाचन प्रणालीमा जानुपर्ने नत्र भए राष्ट्रिय स्वतन्त्र पार्टीले यसपटकको निर्वाचनमा ल्याएको जस्तो बहुमत अर्को पटक नआउने उल्लेख गरे ।

‘पुराना चुनौतीहरू कांग्रेसले सामना गर्दै आएको छ । अब एक्काइसौँ शताब्दीका नयाँ चुनौतीहरू पनि सामना गरोस् । हाम्रै कारणले गर्दा गतवर्ष जेन-जी आन्दोलन भयो । किन हामीले हाम्रा छोराछोरीलाई सपना र विश्वास दिलाउन सकेनौं ? १० वर्षको समय पर्याप्त थिएन होला । तर अहिले पनि तपाईँहरूसँग समय छ ।’ भट्टराईले भने ।

छोटो समयमै मलेसिया, कोरिया, चीन र अरु देशहरू विकासित भएको भन्दै उनले हामीले पनि अबको १० वर्षमा त्यहाँ कसरी पुग्ने भन्ने योजना बनाउनुपर्ने बताए ।