काठमाडौं– पूर्वप्रधानमन्त्री डा बाबुराम भट्टराईले संविधानमा छेडखानी नगरी आवश्यक सुधार मात्र गर्नुपर्नेमा जोड दिएका छन् । 

शुक्रबार काठमाडौंको खुल्लामञ्चमा कांग्रेसको १५औँ महाधिवेशनको उद्घाटन समारोहमा शुभकामना व्यक्त गर्दै भट्टराईले संविधानका मूल खम्बाहरू-गणतन्त्र, सङ्घीयता, धर्मनिरपेक्षता र समावेशी लोकतन्त्र-मध्ये कुनै एक खम्बा ढलेमा सिङ्गो व्यवस्था नै खतरामा पर्ने चेतावनी दिँदै संविधानमा छेडखानी नगरी आवश्यक सुधार मात्र गर्नुपर्नेमा जोड दिए ।

वर्तमान संविधान दशौँ हजार नागरिकको बलिदानबाट बनेकाले यसको संरक्षण गर्नु सबैको दायित्व भएको उनको भनाइ छ । उनले  देशमा ५ वर्षसम्म चल्ने स्थिर सरकार निर्माणका लागि संविधान संशोधन गरी प्रत्यक्ष निर्वाचित कार्यकारी राष्ट्रपति र पूर्ण समानुपातिक व्यवस्थापिका को ढाँचामा जान सुझाव दिए।

भट्टराईले  विस्तृत शान्ति सम्झौता भएको २० वर्ष बित्न लाग्दा पनि सत्य निरूपण तथा मेलमिलाप आयोग र बेपत्ता छानबिन आयोगका कामहरू टुंगोमा नपुगेकोमा चिन्ता व्यक्त गरे ।

उनले देश विकासका लागि स्पष्ट र दीर्घकालीन योजना बनाएर राजनीतिक दलहरूबीच त्यसको कार्यान्वयनका लागि प्रतिस्पर्धा हुनुपर्ने धारणा राखे । भट्टराईले राजनीतिक स्थिरताका लागि नयाँ पुस्तालाई विश्वास गर्नुपर्नेमा पनि जोड दिए ।