काठमाडौँ – पूर्वप्रधानमन्त्री डा. बाबुराम भट्टराईले देश विकासका लागि आगामी १० देखि २० वर्षभित्र मुलुकलाई कहाँ पुर्‍याउने भन्ने स्पष्ट दीर्घकालीन योजना अहिल्यै बनाउनुपर्नेमा जोड दिएका छन्।

नेपाली कांग्रेसको १५औँ महाधिवेशनको उद्घाटन सत्रलाई आइतबार काठमाडौँको खुलामञ्चमा सम्बोधन गर्दै पूर्वप्रधानमन्त्री भट्टराईले देश निर्माणको साझा लक्ष्य र योजनामा सम्पूर्ण राजनीतिक दलहरू एक ठाउँमा उभिनुपर्ने बताए।

“हामी आगामी १०–२० वर्षमा देशलाई कहाँ पुर्‍याउने भनेर अहिल्यै योजना बनाऔँ र सबै पार्टीहरू मिलेर लागौँ,” उनले भने, “त्यसो भएन भने हामी यस्तै महाधिवेशन र समारोहमा आउने, एकअर्काको गुनगान गाउने र फर्कने परिपाटी मात्र दोहोरिरहन्छ।”

सम्बोधनका क्रममा डा. भट्टराईले कांग्रेसभित्र नयाँ पुस्ताले हिम्मत गरेर नेतृत्व र रूपान्तरणको पहल बढाएको भन्दै प्रशंसासमेत गरे। नयाँ पुस्ताले अघि सारेको हिम्मत र सोचले मुलुकको राजनीतिमा सकारात्मक सन्देश दिएको उनको भनाइ थियो।