काठमाडौँ – नेपाली कांग्रेसको १५ औँ महाधिवेशनका अवसरमा विभिन्न देशका सत्तारूढ तथा प्रमुख राजनीतिक दल र तिनका शीर्ष नेताहरूले सफलताको शुभकामना व्यक्त गरेका छन्।

काठमाडौँको खुलामञ्चमा आइतबारदेखि सुरु भएको महाधिवेशनका लागि भारतको सत्तारूढ भारतीय जनता पार्टी (भाजपा) का अध्यक्ष नितिन नवीन र प्रमुख प्रतिपक्षी दल इन्डियन नेसनल कांग्रेसका अध्यक्ष मल्लिकार्जुन खर्गेले शुभकामना सन्देश पठाएका छन्।

यसैगरी, चिनियाँ कम्युनिस्ट पार्टी, सोसलिस्ट इन्टरनेसनलका अध्यक्ष एवं स्पेनका प्रधानमन्त्री पेड्रो सान्चेज तथा बंगलादेशका प्रधानमन्त्री तारिक रहमानले पनि महाधिवेशन सफलताको कामना गरेका छन्। बेलायतको लेबर पार्टी र इन्टरनेसनल काउन्सिल अफ एसियन पोलिटिकल पार्टीज (आईक्याप) स्ट्यान्डिङ कमिटी लगायत एसिया तथा युरोपका विभिन्न राजनीतिक संस्था तथा दलहरूबाट पनि शुभकामना प्राप्त भएको कांग्रेसले जनाएको छ।

‘परम्पराको सम्मान र परिवर्तनको संकल्प : समुन्नत नेपालका लागि सबल कांग्रेसको विकल्प’ भन्ने मूल नाराका साथ सुरु भएको कांग्रेसको १५औँ महाधिवेशन आगामी असोज २२ गतेसम्म सञ्चालन हुनेछ।