काठमाडौँ– यूईएफए नेसन्स लिगमा स्पेनले चेकियालाई हराएको छ । गएराति भएको समूह सी को खेलमा स्पेनले चेकियालाई ३–१ गोलले हराउँदै आफ्नो अपराजित यात्रा कायम राखेको हो ।

स्पेनका लागि लामिन यमाल, रोड्री र मिकेल मेरिनोले एक–एक गोल गरेका थिए । चेकियाका जिरी स्लामाले एक गोल फर्काएका थिए ।

खेलको छैटौँ मिनेटमा यमालले गोल गर्दै स्पेनलाई सुरुवाती अग्रता दिलाएका थिए । यस्तै, ३५औँ मिनेटमा रोड्रीले गोल गरेपछि स्पेनले २–० गोलको अग्रता लियो ।

त्यसपछि ६९ औँ मिनेट चेकियाका जिरीले गोल गर्दै खेललाई २–१ गोलको स्थितिमा ल्याए । तर ८९ औँ मिनेटमा मिकेलले गोल गरेसँगै स्पेन ३–१ गोलले विजयी भयो ।

यो जितसँगै स्पेन ९ अंकसहित समूहको शीर्षस्थानमा यथावत रहेको छ भने पराजित भएको चेकिया अन्तिममा छ ।