काठमाडौं – प्रतिनिधिसभाका सांसदले शपथ लिएको ६ महिना पूरा भएको छ । गत फागुन २१ गते सम्पन्न निर्वाचनबाट निर्वाचित सांसदले चैत १२ गते शपथ लिएसँगै प्रतिनिधिसभाको नयाँ कार्यकाल सुरु भएको थियो ।

प्रतिनिधिसभाको पहिलो बर्खे अधिवेशन र राष्ट्रिय सभाको चालु अधिवेशन शुक्रबार मध्यरात १२ बजेदेखि अन्त्य भएको छ । गत वैशाख २८ गतेदेखि सुरु भएको प्रतिनिधिसभाको बर्खे अधिवेशन १४५ दिन सञ्चालन भयो ।

यस अवधिमा संसदमा विधेयक, नीति तथा कार्यक्रम र सरकारका कामकारबाहीबारे छलफलसँगै केही रोचक तथा विवादास्पद घटनासमेत भए । प्रधानमन्त्री बालेन्द्र शाहले दिएको सीमासम्बन्धी अभिव्यक्तिको विषयले प्रतिनिधिसभामा निकै चर्चा पायो । प्रतिपक्षी दलले अधिवेशनका पछिल्ला बैठकसम्म पनि उक्त विषय उठाउँदै आएका थिए ।

अधिवेशनकै क्रममा प्रधानमन्त्री शाह र श्रम संस्कृति पार्टीका अध्यक्ष हर्क साम्पाङबीच संसद् परिसरमा भएको अंकमाल पनि चर्चामा रह्यो ।

सांसदले प्रधानमन्त्रीसँग प्रत्यक्ष प्रश्नोत्तर गर्न पाउनुपर्ने विषय पनि संसदमा उठ्यो । प्रतिनिधिसभा नियमावली, २०८३ को संशोधनमाथि निर्णय अघि बढाउने क्रममा जेठ १७ गते सत्तापक्ष र प्रतिपक्षी सांसदबीच टेबलमै चढेर घम्साघम्सी भएको थियो । त्यस क्रममा केही प्रतिपक्षी सांसद सभामुखको आसनतर्फ समेत अघि बढेका थिए ।

राष्ट्रपति रामचन्द्र पौडेलले संसदमा सरकारको नीति तथा कार्यक्रम प्रस्तुत गरिरहेका बेला प्रधानमन्त्री शाह उठेर हिँडेको घटनाले पनि चर्चा पायो ।

यसरी नयाँ सांसदको शपथदेखि संसदभित्रको राजनीतिक विवाद, नाराबाजी, घम्साघम्सी र सत्ता–प्रतिपक्षबीचको टकरावसँगै प्रधानमन्त्री शाह र हर्क साम्पाङबीचको आत्मीयतासम्मका विभिन्न घटनाले प्रतिनिधिसभाको पहिलो ६ महिना चर्चामा रह्यो ।

तस्बिर : नेपाल फोटो लाइब्रेरी