काठमाडौं– राष्ट्रिय स्वतन्त्र पार्टी (रास्वपा)की सांसद् आशिका तामाङले दसैँमा पशुमाथि हुने क्रूरता रोक्न सरकारसँग माग गरेकी छन् ।

शुक्रबार संसदमा बोल्दै दसैँ आउन अब करिब १० दिन मात्रै बाँकी रहेको उल्लेख गर्दै उनले मानिसका लागि दसैँ उत्सव भए पनि निर्दोष पशुका लागि भने ‘दशा’ बन्ने गरेको बताएकी छन् ।

उनले दसैँका नाममा खसी, बोका तथा राँगालगायत पशुलाई सार्वजनिक रूपमा क्रूरतापूर्वक हत्या गरी बलि दिने प्रचलनप्रति आपत्ति जनाएकी छन् । ‘माता दुर्गाको भन्दा बढी ध्यान खसी, बोका र राँगा कसरी ढाल्ने भन्नेमा छ,’ उनले भनेकी छन् ।

विदेशमा पशुमाथि हुने क्रूरताका आधारमा कानुनी कारबाही हुने व्यवस्था रहेको आफूले देखेको उल्लेख गर्दै तामाङले नेपालमा पशु कल्याणसम्बन्धी कानुनी व्यवस्था कमजोर रहेको बताएकी छन्।

उनले पशु सेवाका नाममा बनेका नीतिले पशुबाट लाभ लिने तर उनीहरूको वास्तविक संरक्षण र कल्याणमा ध्यान नदिने गरेको आरोप लगाउँदै त्यस्तो नीति कहिले परिवर्तन वा खारेज हुने भन्ने प्रश्नसमेत गरेकी छन्।