काठमाडौं – नेपाली कांग्रेस देउवा पक्षको १५औँ महाधिवेशनअन्तर्गत बिहीबारसम्म देशभरका ३ हजार १९१ वडामा अधिवेशन सम्पन्न भएको छ।

कांग्रेस केन्द्रीय निर्वाचन समितिका अनुसार सात प्रदेशका कुल ६ हजार ७३४ वडामध्ये असोज १५ गतेसम्म ३ हजार १९१ वडाको अधिवेशन सम्पन्न भएको हो।

प्रदेशगत विवरणअनुसार कोशी प्रदेशका १ हजार १५७ वडामध्ये ५७७, मधेसका १ हजार ३२१ मध्ये ४०२, बागमतीका १ हजार १२१ मध्ये ५६३, गण्डकीका ५९० मध्ये ३६६, लुम्बिनीका १ हजार ९३ मध्ये ५५०, कर्णालीका ७१८ मध्ये २४७ र सुदूरपश्चिमका ७३४ वडामध्ये ४५६ वडामा अधिवेशन सम्पन्न भएको छ।

निर्वाचन समितिले बाँकी रहेका वडाहरूमा क्रमशः असोज १८ गतेसम्म अधिवेशन सम्पन्न गर्ने कार्यतालिका रहेको जनाएको छ।

बाढीपहिरोका कारण रसुवा जिल्लामा अधिवेशन हुन नसकेको समितिले जनाएको छ। त्यस्तै, बागलुङमा पार्टी नेता मणिमान शर्माको निधनका कारण स्थगित भएको अधिवेशन असोज १६ गते सम्पन्न हुने जनाइएको छ।