काठमाडौं – राष्ट्रिय स्वतन्त्र पार्टी (रास्वपा) की सांसद समीक्षा बाँस्कोटाले लामो समयदेखि विभिन्न मन्त्रालयमा अड्किएका सङ्क्रमणकालीन न्यायसम्बन्धी फाइल अघि बढाउन सरकारसँग आग्रह गरेकी छन्।

प्रतिनिधिसभाको शून्य समयमा बोल्दै बाँस्कोटाले करिब २० वर्षदेखि शान्ति मन्त्रालय हुँदै गृह र कानुन मन्त्रालयमा थन्किएका सङ्क्रमणकालीन न्यायसम्बन्धी फाइललाई सरकारले प्राथमिकतामा राख्नुपर्ने बताइन्।

‘सरकारले सात दिनभित्र फाइल अगाडि बढाउने भनेको कुरा सकारात्मक छ, तर ती फाइलहरू कहाँ र कुन अवस्थामा छन् भन्ने कुरा महत्वपूर्ण हुन्छ,’ उनले भनिन्।

बाँस्कोटाले एक वर्षदेखि गृह मन्त्रालयमा अड्किएको जेन-जी आन्दोलनसँग सम्बन्धित फाइलसमेत तत्काल अघि बढाउन माग गरिन्।

उनले सङ्क्रमणकालीन न्यायसँग सम्बन्धित विषय लामो समयदेखि थाती रहेकाले सरकारले स्पष्ट कार्ययोजनासहित ती फाइलको टुङ्गो लगाउनुपर्ने बताइन्।