चितवन– निरन्तरको वर्षापछि नारायणी नदीमा आएको बाढीले नारायणगढस्थित नदी किनारमा ठूलो क्षति पुर्‍याएको छ ।

करोडौँ रुपैयाँ खर्चेर संरक्षण गरिएको क्षेत्र बाढीपछि क्षतविक्षत बनेको छ । चितवन महोत्सव आयोजना स्थलमा अहिले ढुंगा र माटो मात्रै देखिन्छ भने कतिपय ठाउँ कटान भएको छ ।  

‘सी–बिच’ मोडलमा निर्माण गरिएको संरचनाले थप क्षति रोक्न केही भूमिका खेलेपनि किनार खण्डहरजस्तै बनेको छ ।

बाढी आएपछि किनारमा रहेका कतिले आफ्नो घर, पसलबाट सामान सार्न पनि भ्याएनन् । बाढी पसेपछि कति स्थानीय अहिले सरसफाइ र सामान सार्न व्यस्त छन् ।

नदीको कटान बढ्दै गए नारायणगढ बजारसमेत जोखिममा पर्न सक्ने स्थानीयको चिन्ता छ । २०१९ सालदेखि नारायणगढ बस्दै आएका प्रभातकुमार जोशीले नारायणी किनारको संरक्षणमा तत्काल विशेष ध्यान दिनुपर्ने बताए । 

नदीको संरक्षण नगरेमा र प्रकृतिलाई जिस्काएर किनारमै बस्ती विस्तार गर्न थालेमा नारायणगढ बजारको भविष्य नै जोखिममा पर्ने उनले चिन्ता व्यक्त गरे ।  

तस्बिर : राजेन्द्र आचार्य/नेपाल फोटो लाइब्रेरी