काठमाडौं– शुक्रबारदेखि प्रदर्शनमा आएको नेपाली फिल्म ‘बाः एक योद्धा’ले सुरुवाती दिनमा दर्शकको राम्रो साथ पाइरहेको निर्माण पक्षले जनाएको छ । 

लगातारको झरीका बीच पनि फिल्मले देशभरका हलमा दर्शक तान्न सफल भएको र शनिबार अधिकांश शोमा उपस्थिति शुक्रबारभन्दा राम्रो देखिएको निर्माण पक्षको दाबी छ । यद्यपि, फिल्मको आधिकारिक कमाइ भने सार्वजनिक गरिएको छैन ।

निर्देशक हरि लम्सालका अनुसार फिल्मले दर्शकबाट सकारात्मक प्रतिक्रिया पाइरहेको छ। विशेषगरी फिल्मले उठाएको बुवाको त्याग, संघर्ष र सन्तानप्रतिको जिम्मेवारीको कथाले दर्शकलाई छोएको उनको भनाइ छ ।

‘बाः एक योद्धा’ले सन्तानको भविष्य बनाउन बुवाआमाले गर्ने संघर्षदेखि उनीहरू वृद्ध हुँदै जाँदा भोग्नुपर्ने एक्लोपन र पीडासम्मका विषयलाई कथामा समेटेको छ । 

आफ्ना इच्छा र अधिकारका कुरा गरिरहँदा सन्तानले अभिभावकप्रतिको जिम्मेवारी बिर्सन नहुने सन्देश फिल्मले दिन खोजेको निर्देशक लम्साल बताउँछन् ।

फिल्म हेरेका केही अभिभावकले आफ्ना सन्तानलाई पनि फिल्म देखाउनुपर्ने प्रतिक्रिया दिएको निर्देशकको भनाइ छ । उनका अनुसार पारिवारिक सम्बन्ध र अभिभावकप्रतिको दायित्व सम्झाउने भएकाले फिल्मले दर्शकमा भावनात्मक प्रभाव पारिरहेको छ ।

हरि लम्सालकै लेखन तथा निर्देशन रहेको फिल्ममा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापाको अभिनय छ । 

आर्टिस्टिक इन्टरटेनमेन्टको ब्यानरमा बनेको फिल्मका निर्माता वसन्त लम्साल र कार्यकारी निर्माता अनिल बुढाथोकी हुन् ।