लण्डन– राष्ट्रिय स्वतन्त्र पार्टी (रास्वपा) का अन्तर्राष्ट्रिय सम्बन्ध तथा कूटनीति विभागका सदस्य हिक्मतजंग कार्की र बेलायती कन्जरभेटिभ पार्टीका अन्तर्राष्ट्रिय सम्बन्ध निर्देशक तथा पूर्वप्रधानमन्त्री ऋषि सुनकका सल्लाहकार अमित जोगियाबीच लण्डनमा भेटवार्ता भएको छ ।

भेटमा नेपाल–बेलायत ऐतिहासिक तथा मैत्रीपूर्ण सम्बन्धलाई थप सुदृढ बनाउने र दुई राजनीतिक दलबीच संवाद, सहकार्य तथा अनुभव आदानप्रदानका सम्भावनाबारे छलफल भएको थियो ।

उक्त अवसरमा नेता कार्कीले नेपालमा गत अगस्ट २६ मा आएको विनाशकारी बाढी तथा त्यसपछिको अवस्थाबारे जानकारी गराए ।

बाढीबाट भएको जनधनको क्षति, उद्धार तथा राहतका प्रयास र प्रभावित क्षेत्रमा परेको दीर्घकालीन असरबारे पनि उनले जानकारी गराएका थिए । 

उनले बाढीका क्रममा सम्पर्कविहीन भएका बेलायती नागरिकहरू तथा उनीहरूका परिवारजन र प्रियजनप्रति गहिरो दुःख तथा समवेदना व्यक्त गरे । यसका साथै, विपद्को कठिन परिस्थितिमा बेलायत सरकारबाट प्राप्त सहयोग तथा मानवीय सहायताप्रति धन्यवाद व्यक्त गरे ।

नेता कार्कीले रास्वपाको राजनीतिक दृष्टिकोण तथा नेपाल सरकारका आर्थिक विकास, सुशासन, वैदेशिक लगानी, निजी क्षेत्रको प्रवर्द्धन र रोजगारी सिर्जनासम्बन्धी प्राथमिकताबारे पनि जानकारी गराए ।

अमित जोगियाले नेपाल–बेलायत सम्बन्धप्रति सकारात्मक धारणा व्यक्त गर्दै आगामी दिनमा रास्वपा र बेलायती कन्जरभेटिभ पार्टीबीच सम्बन्ध, संवाद तथा सहकार्य विस्तार गर्न आफूहरू इच्छुक रहेको बताए ।

भेटमा दुई दलबीच संस्थागत तथा पार्टी–टु–पार्टी सम्बन्ध स्थापना गर्ने विषयमा समेत छलफल भयो । नेता कार्कीले नेपाल फर्किएपछि रास्वपाको केन्द्रीय नेतृत्वसँग आवश्यक परामर्श गरी यस विषयमा आवश्यक पहल गर्ने बताएका छन् ।