बर्लिन– विश्वभर जडान हुने औद्योगिक रोबोटमध्ये चीनको हिस्सा ५९ प्रतिशत पुगेको छ ।

अन्तर्राष्ट्रिय रोबोटिक्स महासङ्घ (आइएफआर) को ‘विश्व रोबोटिक्स २०२६’ प्रतिवेदनअनुसार सन् २०२५ मा चीनमा तीन लाख ५४ हजार औद्योगिक रोबोट जडान भएका थिए । यो अघिल्लो वर्षको तुलनामा २० प्रतिशत बढी हो ।

फ्र्याङ्कफर्टस्थित आइएफआरका अध्यक्ष जेन हेफनरले एक दशकअघि सुरु गरिएको राष्ट्रिय रोबोटिक्स रणनीतिका कारण चीनले औद्योगिक क्षेत्रको आधुनिकीकरणमा उल्लेख्य प्रगति गरेको बताएका छन् । चीनको १५औँ पञ्चवर्षीय योजना (२०२६–२०३०) ले पनि रोबोटिक्स र कृत्रिम बौद्धिकताको प्रयोगलाई प्राथमिकता दिएको उनले उल्लेख गरे।

चीनमा औद्योगिक रोबोटको माग विद्युतीय तथा विद्युतीय उपकरण, मोटर वाहन, धातु तथा मेसिनरी उद्योगबाट बढी आएको प्रतिवेदनमा उल्लेख छ । सन् २०२५ मा विद्युतीय तथा विद्युतीय उपकरण उद्योगमा ९६ हजार चार सय, मोटर वाहन उद्योगमा ७८ हजार नौ सय तथा धातु तथा मेसिनरी उद्योगमा ७८ हजार सात सय औद्योगिक रोबोट जडान भएका थिए ।

चिनियाँ रोबोट निर्माता कम्पनीहरूको घरेलु बजार हिस्सा पनि बढेको छ । सन् २०२५ मा चिनियाँ कम्पनीले आपूर्ति गरेका औद्योगिक रोबोटको जडान १५ प्रतिशतले बढेर एक लाख ९५ हजार पुगेको थियो । यो चीनमा भएको कुल औद्योगिक रोबोट जडानको ५५ प्रतिशत हो ।

आइएफआरका अनुसार चीनको औद्योगिक रोबोट बजार अझै सन्तृप्त भएको छैन । सन् २०२९ सम्म चीनको औद्योगिक रोबोट बजारमा वार्षिक पाँचदेखि १० प्रतिशत वृद्धि हुने अपेक्षा गरिएको छ ।

जनसङ्ख्यामा आएको परिवर्तन र श्रमिक अभावका कारण उद्योगमा स्वचालनको माग बढ्ने तथा रोबोटको प्रयोगले उत्पादनलाई श्रमिक अभावप्रति थप लचिलो बनाउन सहयोग गर्ने महासङ्घले जनाएको छ ।