काठमाडौं– ग्लोबल आइएमई बैंक लिमिटेडले आफ्नो स्थापनाको दुई दशक पूरा गर्दै २०औँ वार्षिक साधारणसभा आगामी १६ असोज २०८३ मा आयोजना गर्दैछ ।  

बैंकको हाल ३४१ शाखा, ३६६ एटीएम, १४१ शाखारहित बैंकिङ सेवा, ६९ एक्सटेन्सन काउन्टर तथा राजस्व संकलन काउन्टर र विदेशमा ३ प्रतिनिधि कार्यालय सहितको सेवा सञ्जाल रहेको छ । 

बैंकले देशभरका विभिन्न सेवा माध्यममार्फत १,००० भन्दा बढी सेवा केन्द्रबाट ग्राहकलाई बैंकिङ सेवा प्रदान गर्दै आएको छ ।

आर्थिक वर्ष २०८२/८३ को अन्त्यसम्म बैंकको कुल निक्षेप रु. ७००.४४ अर्ब, कुल कर्जा रु. ४७६.८४ अर्ब तथा चुक्ता पुँजी रु. ३८.११६ अर्ब पुगेको छ । सो अवधिमा बैंकले रु. ६.०३६ अर्ब खुद नाफा आर्जन गरेको छ, जुन अघिल्लो आर्थिक वर्षको तुलनामा १५.९० प्रतिशतले बृद्धि हो । निक्षेपमा २१.८० प्रतिशत तथा कर्जा लगानीमा ८.२२ प्रतिशत वृद्धि भएको छ । 

साथै, बैंकले सेयर धनीहरूलाई १०प्रतिशतको लाभांश वितरण गर्ने प्रस्ताव साधारण सभामा लगेको छ । उक्त सभाबाट स्वीकृत भएपश्चात् सेयर धनीलाई लाभांश वितरण गर्नेछ ।