भोजपुर- नेपाली कांग्रेस भोजपुर नगरपालिका नगर कार्यसमितिको अधिवेशन भाँडिएको छ । बुधबार भोजपुर नगरपालिकाको हलमा भएको नगर अधिवेशनमा सभापतिको उम्मेदवारबारे कुरा नमिल्दा भाँडिन पुगेको हो।

भोजपुर नगरपालिकाका मेयर समेत रहेका कांग्रेस नेता कैलाश आलेले नगर सभापतिका लागि अशोक राईसहित तीनजनालाई अघि सारेका थिए । तर भोजपुर नगरपालिका ३ र ४ नम्बर वडा कार्यसमितिले बहिष्कार गरेपछि नगर अधिवेशन रोकिएको हो ।

कांग्रेसका एक सहभागी कार्यकर्ताका अनुसार आलेले अधिवेशनस्थलमा छुद्र शैलीमा थर्काउने काम गरेका थिए । उनले आफूनिकट वडा नम्बर ७ का जय तामाङसहितलाई सभापति बनाउन खोज्दा वडा नम्बर ३ र ४ कार्यसमितिले असहमति जनाए ।

वडा नम्बर ४ बाट प्रेम भण्डारी नगर सभापतिको दौडमा थिए। तर आलेले पेलेर आफूनिकटलाई बनाउन खोजेपछि वडा नम्बर ३ का सभापति डिल्ली थापा र ४ का सभापति कुमार राउतसहितले अधिवेशन नै बहिष्कार गरिदिएका हुन् ।

‘आलेले अधिवेशनस्थलमा कसैले बहिष्कार गरेर केही पनि हुँदैन भनेर छुद्र व्यवहार देखाए’, अधिवेशनमा सहभागी एक नेताले भने, ‘उनको उक्त व्यवहारको हामीले प्रतिवाद गरेर दुवै वडाका सबै प्रतिनिधिले बहिष्कार गरेका छौँ।’

अन्य १० वटा वडा कार्यसमिति अधिवेशन अघि बढाउन तयार भए पनि दुईवटा वडाको कदमपछि कार्यक्रम रोकिन पुगेको हो । अब बिहीबार सहमति हुन सकेमा मात्रै अधिवेशनले गति लिने बताइएको छ।