काठमाडौं – राष्ट्रिय स्वतन्त्र पार्टी (रास्वपा) का सांसद मधु कुमार चौलागाइँले वर्तमान न्यायपालिका स्वेच्छाचारी र निरङ्कुशतातर्फ अग्रसर भएको टिप्पणी गरेका छन् ।

बुधबार प्रतिनिधिसभाको शून्य समयमा बोल्दै सांसद चौलागाईले लोकतन्त्रमा नागरिकलाई निष्पक्ष र छिटो न्याय प्रदान गर्ने स्वतन्त्र तथा सक्षम न्यायपालिका आवश्यक भए पनि वर्तमान न्यायपालिका स्वेच्छाचारी र निरङ्कुशतातर्फ उन्मुख भएको आरोप लगाए।

उनले सर्वोच्च अदालतले प्रतिनिधिसभा नियमावलीको नियम १४० को उपनियम ११ र नियम २५९ तत्काल कार्यान्वयन नगर्न जारी गरेको अन्तरिम आदेशले संविधान संशोधनको संवैधानिक बाटोलाई प्रत्यक्ष रूपमा अवरुद्ध गरेको दाबी गरे।

जनताका निर्वाचित प्रतिनिधिहरूको सर्वोच्च थलो संघीय संसद्को सार्वभौम अधिकार र क्षेत्राधिकारमाथि उक्त आदेशले गम्भीर कुण्ठा पु¥याएको उनको भनाइ थियो ।

सांसद चौलागाईले संसद्को अधिकार क्षेत्रमा भएको हस्तक्षेप र न्यायिक निरङ्कुशता रोक्न समग्र न्यायपालिकाको आमूल पुनर्संरचना आवश्यक भइसकेको धारणा राखे।

उनले न्यायपालिकालाई नागरिकप्रति उत्तरदायी, स्वतन्त्र र प्रभावकारी बनाउन आवश्यक सुधारतर्फ राज्यको ध्यान जानुपर्नेमा जोड दिए।