काठमाडौं- नेकपा एमालेको ११औं महाधिवेशनमा अध्यक्ष पदमा केपी शर्मा ओलीसँग पराजित भएका ईश्वर पोखरेलले अध्यक्ष ओलीलाई सम्बोधन गर्दै पत्र पठाएका छन् । पोखरेलले आफू श्रीमतीको उपचारमा रहेकाले बैठकमा उपस्थित हुन नसकेको जानकारी दिएका छन् ।

पत्रमा पोखरेलले ओलीलाई सम्मानजनक हिसाबमा बिदा हुन आग्रह गरेका हुन् । ‘पार्टी जटिल अवस्थामा छ । जटिलतर बन्दै गएको अवस्थामा पुनर्गठन नगरी आम पार्टी पङ्क्ति र आम जनतामा समेत आशा जगाउन सकिन्न, अगाडि बढ्न सकिन्न,’ ईश्वरले लेखेका छन्, ‘यसका लागि देशभरिका आम कार्यकर्ताहरूको चाहना र माग बमोजिम तपाईँको सम्मानजनक मार्ग प्रशस्त विशेष महत्त्वपूर्ण हुनेछ ।’

पोखरेलले ओलीसँग माफी माग्दै एघारौँ महाधिवेशनमा भनेका आफ्ना भनाइहरु सम्झिएका छन् । त्यसबेला ओलीले ती भनाइहरूलाई नमिठो मानेको उदृत गर्दै पोखरेले पार्टीमा जेजे गर्नु छ विधि प्रक्रिया बमोजिम गर्न आग्रह गरेका छन् ।