काठमाडौं–  नेकपा (एमाले)को केन्द्रीय कमिटी बैठकमा ९५ प्रतिशतभन्दा बढी सदस्यको सहभागिता रहेको पार्टीले दाबी गरेको छ ।

ललितपुरको भैंसेपाटीस्थित पार्टी प्यालेसमा सुरु हुन लागेको बैठकमा अधिकांश केन्द्रीय सदस्य उपस्थित रहेको एमाले सचिव शेरधन राईले जानकारी दिए । बैठक सुरु भएपछि हाजिरीमार्फत यकिन उपस्थिति विवरण सार्वजनिक हुने उनले बताए ।

एमालेको केन्द्रीय कमिटीमा ३०१ जना सदस्य छन् । करिब छ महिनापछि केन्द्रीय कमिटी बैठक बस्न लागेकाले बैठकमा नेताहरूको उत्साहजनक सहभागिता रहेको राईले बताए ।

एमालेले केन्द्रीय कमिटीमा युवा तथा अनुभवी नेताहरूलाई समेटेको छ । लामो समयपछि बस्न लागेको बैठकलाई पार्टीभित्र महत्वपूर्ण रूपमा हेरिएको छ ।

विशेषगरी अध्यक्ष केपी शर्मा ओलीले उपाध्यक्ष रामबहादुर थापा ‘बादल’ले तयार पारेको प्रतिवेदनमा रहेको नेतृत्व पुनर्गठनसम्बन्धी विषय हटाएपछि उक्त विषय बैठकमा उठ्ने सम्भावना छ । 

अध्यक्ष ओलीले प्रतिवेदनबाट सो विषय हटाए पनि केही नेताहरूले केन्द्रीय कमिटी बैठकमा नेतृत्व पुनर्गठनको विषयलाई प्राथमिकताका साथ उठाउने तयारी गरेका छन्।