काठमाडौं – शेखर कोइराला समूहका नेता मानिएका धनराज गुरुङ नेपाली कांग्रेसको मूलधारमा फर्किँदै गगन थापा नेतृत्वको महाधिवेशनमा सहभागी हुने भएका छन् ।

शेखर कोइरालाले शेरबहादुर देउवा नेतृत्वमा भएको महाधिवेशन तथा गगन थापाले गर्न लागेको महाधिवेशनमा सहभागी नहुने बताइरहेका बेला गुरुङले भने थापा नेतृत्वको महाधिवेशनमा सहभागी हुने निर्णय गरेका हुन् ।

आफू गगन थापासँग नजिकिनुको कारणबारे गुरुङले पार्टीलाई एकताबद्ध बनाउन सबै नेताहरू एक ठाउँमा आउनुपर्ने बताएका छन् ।

‘को कता भन्दा पनि कांग्रेस विभाजन भयो भने लोकतन्त्र, गणतन्त्र र राज्यसत्ता नै संकटमा पर्छ। त्यसकारण पनि कांग्रेस सबैले मिलाएर जानुपर्छ,’ गुरुङले भने ।

उनले कांग्रेस विभाजनको पक्षमा आफू हिजो पनि नरहेको र आज पनि नरहेको बताए । अन्य नेताहरू पनि क्रमशः मूल कांग्रेसमा जोडिँदै गएको उनको दाबी छ ।

‘अरू साथीहरू पनि बिस्तारै जोडिँदै हुनुहुन्छ। म कांग्रेस विभाजनको पक्षमा हिजो पनि थिइनँ, आज पनि छैन,’ गुरुङले भने ।

गुरुङसँगै विजयकुमार गच्छेदार पनि गगन थापा नेतृत्वको कांग्रेसतिर आउने तयारीमा रहेको जानकारी दिइएको छ ।