काठमाडौं- नेपाली कांग्रेसका नेता मीन विश्वकर्माले शनिबारबाट सुरू हुने वडा अधिवेशन नरोकिने बताएका छन् ।

बिहीबार शेरबहादुर देउवा पक्षलाई छाडेर गगन थापा नेतृत्वको नेपाली कांग्रेसमा सहभागी भएका विश्वकर्माले पार्टीभित्र एकताका लागि निरन्तर छलफल भइरहेको बताए । क्षेत्रीय अधिवेशनसम्ममा पार्टीभित्रको विवाद समाधान हुने गरी छलफल अघि बढिरहेको उनले बताए ।

‘भोलिबाट सुरु हुने वडाको अधिवेशन रोकिँदैन । ७/८ गतेसम्ममा केही कुरा मिल्छ भन्ने तहमा छलफल जारी छ । गगनजी पनि पार्टी एकताका निम्ति तयार हुनुहुन्छ, शेरबहादुर दाइ पनि तयार हुनुहुन्छ । तर बीचमा केही शक्तिहरूमा समस्या देखिएको हो । त्यो टुंगिएर जान्छ,’ विश्वकर्माले खबरहबसँग भने ।

उनले देउवाको साथ छाड्नुको उद्देश्य पार्टी विभाजन गर्नु नभई कांग्रेसलाई एकताबद्ध बनाउनु रहेको स्पष्ट पारे ।

‘हामीहरू पार्टी मिलाउनका लागि नै देउबा दाइको साथ छोडेर आएका हौँ । उहाँलाई गलत ठानेर हिँडेका होइनौँ । अब उहाँ नेतृत्वमा आउने विषय छैन, उहाँलाई सम्मानपूर्वक पार्टीमा राख्ने विषय मात्र हो,’ उनले भने ।

विश्वकर्माले कांग्रेसलाई एकताबद्ध बनाएर अघि बढाउने विषयमा शीर्ष तहमा निरन्तर संवाद भइरहेको बताए। विश्वकर्मासँग खबरहबले गरेको विस्तृत कुराकानी केही समयपछि प्रकाशित गरिनेछ ।