धनकुटा – गाउँमा बसाइँसराइ गरेर आउने परिवारलाई टिकाइराख्न धनकुटाको छथर जोरपाटी गाउँपालिकाले पाँच वर्षसम्म चलाएको ‘दुहुना गाई’ वितरण कार्यक्रम प्रभावकारी नभएपछि रणनीति फेर्ने भएको छ । गाउँपालिकाले अब गाई वितरणको साटो नयाँ परिवारका लागि ‘सुरक्षित आवास’ कार्यक्रम सुरु गर्ने तयारी गरेको हो ।

नयाँ परिवारलाई उत्पादनसँग जोड्ने र पशुपालनमार्फत आम्दानीको बाटो खोल्ने उद्देश्यले आर्थिक वर्ष २०७७/७८ देखि यो अभियान सुरु गरिएको थियो । पशुपन्छी विकास शाखाका प्रमुख राजकुमार राईका अनुसार ५ वर्षको अवधिमा ५० परिवारलाई लैनो गाई वितरण गरिएको छ । पहिलो वर्ष ९ परिवारलाई गाई दिइएकामा २०७८/७९ मा १०, २०७९/८० मा १८, २०८०/८१ मा ४ र २०८१/८२ मा ३ परिवारले गाई पाएका थिए ।

बसाइँसराइ गरेर आउने परिवारका लागि आम्दानीको स्रोतभन्दा पहिले स्थायी बसोबासको आधार आवश्यक देखिएकाले घर निर्माणमा सहयोग गर्ने तयारी गरिएको गाउँपालिका अध्यक्ष छत्रबहादुर सुब्बाले बताए । “दीर्घकालीन रूपमा परिवारलाई गाउँमा टिकाउन आयआर्जनसँगै स्थायी र सुरक्षित आवासको आवश्यकता देखियो । त्यसैले अब घर निर्माणमा सहयोग गर्ने कार्यक्रमलाई प्राथमिकता दिन लागिएको हो,” उनले भने ।

छथर जोरपाटीमा बसाइँसराइ गरेर आउनेमा सबैभन्दा बढी छिमेकी जिल्ला तेह्रथुमका छन् । त्यसबाहेक धनकुटाकै अन्य स्थानीय तह, भोजपुर, सङ्खुवासभा र झापाबाट पनि परिवारहरू आएका छन् ।