काठमाडौँ – १६ वर्षीय युवा खेलाडी म्याक्स डोउम्यानको दुई गोलमद्दतमा आर्सनलले इङ्लिस लिग कपमा इप्सविच टाउनलाई ४–२ गोल अन्तरले पराजित गरेको छ। पोर्टम्यान रोडमा भएको खेलमा उत्कृष्ट प्रदर्शन गरे पनि आर्सनलका मुख्य प्रशिक्षक मिकेल अर्टेटाले भने उनको विकासमा कुनै हतार नगर्ने र संयम अपनाउने बताएका छन्।

गत सिजन १३ खेल खेलेका डोउम्यानले जारी सिजन भने प्रायः बेन्चमै समय बिताउनु परेको थियो। मंगलबारको खेलमा पाएको अवसरलाई सदुपयोग गर्दै उनले दुई उत्कृष्ट गोल गरे। पहिलो डिफेन्डरहरूलाई छक्याउँदै सुन्दर सोलो गोल गरेका डोउम्यानले दोस्रो गोलमा परिपक्वता देखाउँदै बललाई पोस्टको तल्लो कुनामा दिशा दिएका थिए।

यो प्रदर्शनसँगै उनी सन् २००२ मा एभर्टनका लागि वेन रुनीले गरेयता कुनै पनि प्रतियोगितामा एकै खेलमा दुई गोल गर्ने पहिलो १६ वर्षीय प्रिमियर लिग खेलाडी बनेका छन्।

डोउम्यानको प्रशंसा गर्दै प्रशिक्षक अर्टेटाले भने, “उनी अद्भुत र अप्रत्याशित खेलाडी हुन्। तर उनी अझै १६ वर्षका मात्र हुन्। हामीले उनको विकासमा बाधा पुर्‍याउनु हुँदैन, न त धेरै हतार नै गर्नुहुन्छ। प्रिमियर लिगको माग र दबाब फरक हुने भएकाले उनलाई सही समय र वातावरणमा मात्र मैदानमा उतार्न आवश्यक छ।”