काठमाडौं- बेल्जियममा जासुसीको आरोपमा चीन र बेल्जियमको दोहोरो नागरिकता लिएका एक जना पक्राउ परेका छन् । बेल्जियन अभियोजकहरूका अनुसार ५२ वर्षीय एक व्यक्तिलाई सेमिकन्डक्टर प्रविधिसँग सम्बन्धित जासुसीको आरोपमा गएको मे महिनादेखि हिरासतमा राखिएको छ। उनलाई ब्रसेल्स विमानस्थलबाट बेइजिङ जाने जहाज चढ्नै लाग्दा पक्राउ गरिएको थियो।

आरोपित व्यक्तिले गेलियम नाइट्राइड चिप उत्पादन गर्ने बेल्जियन कम्पनी बेलग्यानमा वरिष्ठ पदमा काम गरेका थिए, जुन कम्पनी सन् २०२४ जुलाईमा दामासाहा टाट पल्टेको घोषित भएको थियो।

अभियोजकहरूका अनुसार उनी एकैसाथ त्यस्तै किसिमका चिप उत्पादन गर्ने एक चिनियाँ कम्पनीको सञ्चालकसमेत रहेका थिए, जुन कम्पनी उनी बेलग्यानमा सामेल भएको केही महिनापछि नै स्थापना भएको थियो र चिनियाँ लगानी कोषबाट वित्तपोषित थियो।

अनुसन्धानकर्ताहरूले विद्युतीय सवारीसाधन, एरोस्पेस र सैन्य प्रयोजनमा प्रयोग हुने गेलियम नाइट्राइड प्रविधिसँग सम्बन्धित बौद्धिक सम्पत्ति र व्यापारिक गोपनीय सूचना अवैध रूपमा विदेश स्थानान्तरण गरेको शंका गरेका छन्। यस प्रकरणमा दोस्रो संदिग्ध अझै फरार रहेका छन्, जबकि बेल्जियमस्थित चिनियाँ दूतावासले तत्काल कुनै प्रतिक्रिया दिएको छैन।