काठमाडौं – हरितालिका तीजका अवसरमा काठमाडौं प्रहरीले अवाञ्छित तथा आपराधिक गतिविधिमा संलग्न हुन सक्ने आशंकामा ७७ जनालाई नियन्त्रणमा लिएको छ ।

जिल्ला प्रहरी परिसर काठमाडौंका अनुसार विगतका घटनाको अध्ययन तथा विश्लेषणका आधारमा तीज पर्वका क्रममा चोरी, लुटपाट, महिला दुर्व्यवहारलगायत अवाञ्छित गतिविधि हुन नदिन प्रहरीले सुरक्षा निगरानी बढाएको थियो ।

सोही क्रममा सम्भावित आपराधिक गतिविधिमा संलग्न हुन सक्ने व्यक्तिहरूलाई नियन्त्रणमा लिइएको प्रहरीले जनाएको छ । नियन्त्रणमा लिइएकाहरूमाथि थप अनुसन्धान भइरहेको छ ।

तीजका अवसरमा काठमाडौंको पशुपतिनाथ मन्दिरमा ठूलो संख्यामा श्रद्धालु पुगेका थिए । जिल्ला प्रहरी परिसर काठमाडौंका अनुसार करिब ४५ हजार श्रद्धालुले पशुपतिनाथ मन्दिरमा दर्शन तथा पूजाआराधना गरेका थिए ।

तीजका क्रममा पशुपति क्षेत्रसहित काठमाडौंका विभिन्न स्थानमा सुरक्षा व्यवस्था कडा पारिएको थियो। प्रहरीले भिडभाड हुने स्थानमा निगरानी बढाउनुका साथै सम्भावित चोरी, लुटपाट र महिला दुर्व्यवहार नियन्त्रणका लागि सुरक्षा टोली परिचालन गरेको थियो ।

प्रहरीका अनुसार दिनभर काठमाडौंमा कुनै अप्रिय घटना भएन । तीज पर्व शान्तिपूर्ण रूपमा सम्पन्न भएको जिल्ला प्रहरी परिसर काठमाडौंले जनाएको छ ।