काठमाडौं – घरेलु बक्स अफिसमा फ्लप भएको नायिका नीता ढुंगानाको फिल्म ‘पार्वती’ले तेस्रो सातामा ४७ लाख ८५ हजार व्यापार गरेको छ ।

तेस्रो विकेन्ड पूरा हुँदा फिल्मको व्यापार २ करोड ५ लाख पुगेको छ । चलचित्र विकास बोर्डका अनुसार यस फिल्मका लागि ७३ हजार २३३ वटा टिकट खरिद-ब्रिकी भएको छ ।

यस फिल्मले दोस्रो विकेन्ड पूरा हुँदा एक करोड ५८ लाखको कमजोर व्यापार गरेको थियो । दोस्रो विकेन्ड अर्थात् सुरुवाती १० दिनको व्यापारले यो फिल्म फ्लप भएको स्पष्ट भइसकेको थियो ।

तथापि, तेस्रो सातामा पिकअप लिने झिनो सम्भावना बाँकी थियो । तेस्रो सातामा पनि यो फिल्मले कुनै चमत्कार गर्न सकेन ।

नीताको डेब्यू निर्देशन रहेको फिल्म ‘पार्वती’ बक्स अफिसमा फ्लप भएको छ । यस फिल्मको शीर्ष कलाकारमा नीता र बाल गायक अशोक दर्जी छन् ।

यो फिल्मको कथा पनि नीताकै हो । स्क्रिप्ट सुभम अधिकारीले लेखेका हुन् ।