काठमाडौं- राजविराजस्थित गजेन्द्रनारायण सिंह सगरमाथा अस्पताल परिसरबाहिरै महिलाले बच्चा जन्माएको घटनालाई लिएर अहिले सामाजिक सञ्जालमा तीव्र बहस भइरहेको छ । यसै सन्दर्भमा स्वास्थ्य तथा जनसंख्यामन्त्री निशा मेहताले घटनालाई लिएर गम्भीर ध्यानाकर्षण भएको जनाएकी छन् ।

सामाजिक सञ्जाल फेसबुकमार्फत आफ्नो धारणा सार्वजनिक गर्दै मन्त्री मेहताले यस घटनालाई मन्त्रालयले गम्भीरतापूर्वक लिएको र सत्यतथ्य पत्ता लगाउन तत्काल छानबिन टोली राजविराज पठाइसकिएको जानकारी दिएकी छिन् ।

स्वास्थ्य संस्थामा पुग्ने हरेक नागरिकले समयमै उपचार, सम्मान र मानवीय व्यवहार पाउने अधिकार राख्ने उल्लेख गर्दै मन्त्री मेहताले घटनाबारे अस्पतालसँग स्पष्टीकरणसमेत माग गरिएको बताइन् ।

निष्पक्ष छानबिन गरी घटनाको वास्तविकता बाहिर ल्याइने र अनुसन्धानका क्रममा कसैको गल्ती वा लापरबाही देखिएमा सम्बन्धित व्यक्तिमाथि प्रचलित कानुनबमोजिम कडा कारबाही गरिने प्रतिबद्धता उनले व्यक्त गरेकी छिन् ।

नागरिकको स्वास्थ्य सेवाप्रतिको विश्वास र अधिकार जोगाउन मन्त्रालय सदैव संवेदनशील र प्रतिबद्ध रहेको पनि उनले स्पष्ट पारेकी छिन् ।