काठमाडौँ – इन्डोनेसियामा ज्वालामुखी विस्फोटपछि वायुमण्डलमा बाक्लो खरानी फैलिएका कारण आठ वटा विमानस्थलको उडान ठप्प हुँदा करिब १ लाख ७० हजार यात्रु अलपत्र परेका छन् ।

अनाक क्राकाटाउ ज्वालामुखी विस्फोटपछि खरानीको बादल वायुमण्डलमा फैलिएपछि अधिकारीले राजधानी जाकार्तास्थित सोएकार्नो-हट्टा अन्तर्राष्ट्रिय विमानस्थलसहित आठ विमानस्थलका उडान स्थगित गरेका हुन् । यातायात मन्त्रालयका अनुसार कम्तीमा १,५५८ उडानहरू प्रभावित भएका छन् ।

शुक्रबार रातिदेखि सुरु भएको ज्वालामुखी विस्फोटका कारण लगातार भूकम्पीय कम्पन, लाभा र भीषण आवाज आएको थियो। आइतबार बिहान पुनः दुई पटक ठूला विस्फोट भएपछि उडान सुरक्षालाई ध्यानमा राख्दै विमानस्थल बन्द गरिएका हुन् । उडान स्थगनका कारण सिंगापुर, दोहा, सिड्नी र कुआलालम्पुर लगायतका अन्तर्राष्ट्रिय गन्तव्यका यात्रु बढी प्रभावित भएका छन् ।

इन्डोनेसियाका यातायात मन्त्री दुदी पुर्वागान्धीले एयरलाइन्सहरूलाई रद्द भएका उडानको रिफन्ड प्रक्रिया छिटो गर्न र यात्रुलाई समयमै सूचना दिन निर्देशन दिएका छन् । मौसम विज्ञान एजेन्सीका अनुसार ज्वालामुखीको खरानी ५० हजार फिट उचाइसम्म पुगेको छ ।

स्वास्थ्य मन्त्रालयले प्रभावित क्षेत्रका बासिन्दालाई घरभित्रै रहन र मास्क प्रयोग गर्न आग्रह गरेको छ । बाक्लो खरानीका कारण आँखा र सास फेर्न समस्या भएपछि धेरै स्थानमा विद्यालयहरू बन्द गरिएका छन् भने माछा मार्ने कामसमेत प्रभावित भएको स्थानीय सञ्चारमाध्यमहरूले जनाएका छन् ।