काठमाडौँ – अष्ट्रेलियामा जारी शृङ्खलाको अन्तिम एकदिवसीय खेलमा नेपाल ‘ए’ पुरुष क्रिकेट टोलीले न्युजिल्यान्ड ‘ए’ लाई जितका लागि २ सय १२ रनको लक्ष्य दिएको छ।

डार्विनस्थित मारारा क्रिकेट मैदानमा टस जितेर पहिले ब्याटिङ रोजेको नेपालले निर्धारित ५० ओभरमा सबै विकेट गुमाएर २ सय ११ रन बनाएको हो।

नेपालका लागि अलराउन्डर पवन सर्राफले अर्धशतकीय पारि खेले। उनले ९२ बलमा ६ चौका प्रहार गर्दै सर्वाधिक ५९ रनको योगदान दिए। अर्का ब्याटर लोकेश बमले ६४ बलमा ४ छक्का र १ चौकाको मद्दतमा ४७ रन बनाए। यस्तै कप्तान अनिलकुमार साहले २४, मयन यादवले २० तथा विपिन खत्रीले १२ रन जोडे। बाँकी ब्याटरले भने दोहोरो अङ्कमा रन जोड्न सकेनन्।

बलिङतर्फ न्युजिल्यान्डका म्याथ्यू फिसरले ९ ओभरमा ३७ रन दिएर सर्वाधिक ४ विकेट लिए।

अघिल्ला दुई खेलमा तासमानियासँग २ विकेट र दक्षिण अष्ट्रेलियासँग १३८ रनको पराजय व्यहोरेको नेपाली टोली अन्तिम खेलमा न्युजिल्यान्ड ‘ए’ लाई पराजित गर्दै भ्रमणको सुखद अन्त्य गर्ने लक्ष्यमा छ।