कपिलवस्तु – सामाजिक सञ्जालमा कृषि प्रविधिसम्बन्धी सामग्री हेरेर सिकेको ज्ञानलाई व्यवहारमा उतार्दै शिवराज नगरपालिका–५ नौडिहवाका किसान रामप्रसाद बेलवासेले व्यावसायिक ड्रागन फ्रुट खेती सुरु गरेका छन्।

करिब डेढ वर्षअघि चार कट्ठा जमिनमा सुरु गरिएको खेतीबाट उनले हालसम्म तीन पटक फल उत्पादन गरिसकेका छन्। रुपन्देहीको रानीबगियाबाट प्रतिबिरुवा १६० रुपैयाँका दरले ६२८ बिरुवा खरिद गरी १५७ पोलमा चार-चार वटाका दरले रोपेर खेती सुरु गरिएको बेलवासेले जानकारी दिए। बिरुवा पूर्ण रूपमा परिपक्व भइनसकेकाले चौथो पटकको फल टिप्ने तयारी भइरहेको र आगामी वर्षदेखि उत्पादन उल्लेख्य बढ्ने उनको अपेक्षा छ।

बजारमा ड्रागन फ्रुटको माग राम्रो रहेकाले बिक्रीका लागि कुनै समस्या नरहेको बेलवासे बताउँछन्। हाल प्रतिकिलोग्राम ४ सय रुपैयाँसम्ममा फल बिक्री भइरहेको र ग्राहकहरू घरमै खरिद गर्न आउने गरेका छन्। युट्युबबाट खेतीसम्बन्धी जानकारी लिएर नयाँ बालीतर्फ आकर्षित भएका उनले सिँचाइको अभाव र गर्मी मौसमलाई मुख्य चुनौतीका रूपमा लिएका छन्।

कृषि ज्ञान केन्द्र कपिलवस्तुका प्रमुख घनश्याम चौधरीले जिल्लामा ड्रागन फ्रुट खेतीको यकिन अभिलेख नभए पनि साना तथा छरिएका रूपमा खेती सुरु हुन थालेको बताए। आकर्षक मूल्य र राम्रो बजार सम्भावनाका कारण परम्परागत बाली छाडेर बढी आम्दानी दिने यस्ता नयाँ फलफूल खेतीतर्फ किसानको आकर्षण बढ्दै गएको छ।