काठमाडाैं – प्रधानमन्त्री वालेन्द्र शाहले श्रीकृष्ण जन्माष्टमीका अवसरमा रसुवा–भोटेकोशी बाढीबाट प्रभावित बालबालिकालाई सम्बोधन गर्दै उनीहरूको सुरक्षित भविष्यका लागि सरकार निरन्तर काम गरिरहेको बताएका छन् ।

सामाजिक सञ्जालमार्फत सन्देश जारी गर्दै प्रधानमन्त्री शाहले बालबालिकालाई ‘भोलिका उज्याला झुल्का’ भन्दै उनीहरूको सुरक्षित भविष्यका लागि आफूहरू सक्दो खटिरहेको बताए ।

उनले यसपटकको श्रीकृष्ण जन्माष्टमीमा रसुवा–भोटेकोशी बाढी प्रभावित क्षेत्रका बालबालिका खुसी हुन नसकेको उल्लेख गरे । बाढीका कारण कतिपय बालबालिका गहिरो पीडामा रहेको र कतिपय अझै स्तब्ध अवस्थामा रहेको उनले बताए ।

“कतिपय नानीबाबुहरूले अचानक के–के भयो, कतिले त सोच्नसमेत नभ्याएको” भन्दै उनले बाढीका कारण बालबालिकाका आँखाले आफ्ना बाबुआमा र आफन्त खोजिरहेका हुन सक्ने उल्लेख गरे ।

प्रधानमन्त्री शाहले विपद्को १०औँ दिनसम्म आइपुग्दा नेपालले ठूलो विपद् भोग्नुपरेको बताए । बाढीका कारण बालबालिकाका साथीहरू छुटेको, घर तथा बस्तीहरू खण्डहर बनेको र खेल्ने चौरहरू पुरिएको उनले उल्लेख गरे ।

उनका अनुसार बाढी गएको लगत्तै सरकारले प्रभावित क्षेत्रबाट गम्भीर घाइते, गर्भवती, सुत्केरी, अपाङ्गता भएका व्यक्ति र वृद्धवृद्धासँगै बालबालिकाको उद्धारलाई पहिलो प्राथमिकतामा राखेको थियो । उद्धारको क्रम अहिले पनि जारी रहेको उनले बताए ।

प्रधानमन्त्री शाहले प्रभावित क्षेत्रमा सञ्चालन गरिएका होल्डिङ सेन्टरमा बसिरहेका बालबालिकाको बसाइ सहज नभएको आफूहरूलाई थाहा रहेको बताए । उनीहरूका लागि चाँडै सुरक्षित र सहज बसोबासको व्यवस्था गरिने उनले प्रतिबद्धता जनाए ।

“पुनः यहाँहरूलाई आफ्नो भविष्यको सपना बुन्ने वातावरण तयार गरिदिनेछौँ”, उनले भनेका छन् ।

प्रधानमन्त्री शाहले भविष्यमा पनि विपद् आउन सक्ने भन्दै जलवायु परिवर्तनको ठूलो असर हिमालय क्षेत्रमा परिसकेको बताए । नेपालमा आएको विपद्का विषयमा विश्व समुदायलाई जानकारी गराउनु आवश्यक रहेको उनले उल्लेख गरे ।

प्रत्यक्ष रूपमा विपद् भोगेका बालबालिकासँगै अन्य क्षेत्रका बालबालिकालाई समेत विपद्बारे सचेत र सतर्क रहन उनले आग्रह गरे । आफ्नो भविष्य सुरक्षित बनाउन बालबालिकाले विपद्सँग लड्न, त्यसबाट बच्न र अरूलाई बचाउन सिक्नुपर्ने उनले बताए ।

उनले विपद् पूर्वतयारीका लागि ‘विपद् झोला’ तयार राख्न, सानो–सानो बचत गर्न तथा अध्ययन र छलफलमा ध्यान दिन बालबालिकालाई आग्रह गरे । जलवायु परिवर्तन के हो र त्यसले मानव जीवन तथा वातावरणमा कस्तो असर पारिरहेको छ भन्ने विषयमा अध्ययन गर्नसमेत उनले सुझाव दिए ।

त्यस्तै, बालबालिकाले आपसमा विपद् तथा जलवायु परिवर्तनका विषयमा छलफल गर्दै जनचेतना फैलाउने काममा पनि अगाडि बढ्नुपर्ने प्रधानमन्त्री शाहले बताए ।

उनले विपद्को भाषा विनाश र दुःख भए पनि संकटका समयमा एकता, सद्भाव र भ्रातृत्वको भावना राखेर अघि बढ्नुपर्नेमा जोड दिए ।

श्रीकृष्णको सन्देशलाई स्मरण गर्दै उनले संघर्ष र विपद्का समयमा हार मानेर वा निराश भएर बस्न नहुने बताए । धैर्य, कर्तव्य र एकताका साथ अघि बढ्दै सबै मिलेर विपद्को सामना गर्नुपर्ने उनको भनाइ छ ।

“हामी रोकिँदैनौँ । त्यसैले हामी सबै मिलेर यो विपद्को सामना गरौँ र सुरक्षित एवं उज्यालो नेपालको निर्माणमा जुटौँ”, प्रधानमन्त्री शाहले भनेका छन्।