काठमाडौं– स्वास्थ्य बीमा बोर्डले स्वास्थ्य बीमा कार्यक्रममा आबद्ध देशभरका सम्पूर्ण सेवा प्रदायक स्वास्थ्य संस्थाहरूलाई अनिवार्य रूपमा इलेक्ट्रोनिक मेडिकल रेकर्ड (ईएमआर) प्रणाली लागू गर्न निर्देशन दिएको छ । 

भदौ १७ गते बोर्डले पत्र लेख्दै हाल अधिकांश स्वास्थ्य संस्थाहरूबाट ‘म्यानुअल’ रूपमा दाबी पेस हुँदा दाबी रुजु र मूल्याङ्कन प्रक्रियामा धेरै समय लाग्नुका साथै भुक्तानीमा समेत ढिलाइ भइरहेकाले बोर्डले यो कदम चालेको हो । म्यानुअल प्रक्रियाका कारण गुणस्तरीय स्वास्थ्य सेवा प्रवाहमा समेत कठिनाइ उत्पन्न भएको बोर्डको ठहर छ । 

स्वास्थ्य बीमा प्रणालीलाई समय सापेक्ष रूपान्तरण गर्दै दाबी व्यवस्थापन प्रक्रियालाई छिटो, पारदर्शी र डिजिटल माध्यमबाट प्रभावकारी बनाउन बोर्डले यस्तो निर्णय गरेको हो । 

अबदेखि स्वास्थ्य संस्थाहरूले प्रदान गर्ने सम्पूर्ण सेवाहरूको दाबी अनिवार्य रूपमा ईएमआर प्रणालीमार्फत नै पेस गर्नुपर्ने व्यवस्था मिलाउन बोर्डले अनुरोध गरेको छ । 

यसका साथै, स्वास्थ्य संस्थाहरूमा हाल सञ्चालनमा रहेका अस्पताल सफ्टवेयर, प्रयोगमा रहेका मोड्युलहरू र आगामी दिनमा ईएमआर प्रणाली विस्तारका लागि तय गरिएका योजनाहरूको जानकारी समेत बोर्डलाई उपलब्ध गराउन निर्देशन दिइएको छ ।