काठमाडौं- भारतका लागि अमेरिकी राजदूत सर्जियो गोरले जम्मु कश्मीरको राजधानी श्रीनगरको भ्रमण गरेका छन् । यो भ्रमणलाई विगत तीन दशकयता अमेरिकी राजदूतबाट यस क्षेत्रमा भएको एक महत्त्वपूर्ण कूटनीतिक कदमको रूपमा हेरिएको छ । राजदूतको जिम्मेवारी सम्हालेलगत्तै जम्मु कश्मीर पुगेका गोरले त्यहाँका मुख्यमन्त्री उमर अब्दुल्लासँग भेटवार्ता गरेका छन् ।

मुख्यमन्त्रीसँगको भेटपछि उनले जम्मु कश्मीर भारतको एक महत्त्वपूर्ण अङ्ग भएको स्पष्ट पारेका छन् । साथै, उनले यस केन्द्रशासित प्रदेशका लागि अमेरिकाको यात्रा सल्लाहकार ( ट्राभल एड्भाइजरी ) को समीक्षा गर्ने सङ्केतसमेत दिएका छन् । मुख्यमन्त्री अब्दुल्लाले हालै जम्मु कश्मीरको राज्यको दर्जा पुनःबहाली गर्नुपर्ने माग जोडदार रूपमा उठाउँदै आएका छन् ।

यद्यपि, मुख्यमन्त्री अब्दुल्लाले अमेरिकी राजदूतसँगको भेटमा आन्तरिक राजनीतिक मुद्दाहरूमाथि कुराकानी नभएको र यस्ता विषयहरू वासिङ्टन नभई नयाँ दिल्लीस्थित केन्द्र सरकारबाटै हल गरिनुपर्ने स्पष्ट पारेका छन् । सन् १९९६ यता बहालवाला अमेरिकी राजदूतहरूबाट श्रीनगरको भ्रमण विरलै हुने गरेको छ ।

पछिल्लो तीन दशकको अवधिमा फ्रायङ्क विस्नर, रोबर्ट ब्ल्याकवेल, टिमोथी रोमर, केन्नेथ जस्टर र हाल सर्जियो गोरसहित जम्मा पाँच जना अमेरिकी राजदूतहरूले मात्र श्रीनगरको आधिकारिक भ्रमण गरेका छन् । यसअघि केन्नेथ जस्टरले दुई पटक भ्रमण गरेका कारण कुल ६ वटा भ्रमणहरू भएका छन् ।

जस्टरले सन् २०१८ को अगस्टमा र सन् २०२० को जनवरीमा विदेशी कूटनीतिज्ञहरूको टोलीसँग श्रीनगरको भ्रमण गरेका थिए । त्यसयता हाल राजदूत गोरले गरेको यो पहिलो एक्लो (स्ट्यान्डअलोन) भ्रमण हो । राजदूत गोरको यो भ्रमणले जम्मु कश्मीरको क्षेत्रीय स्थितिका बारेमा वासिङ्टनको स्पष्ट धारणा पुनः उजागर गरेको छ ।