काठमाडौं – नायिका तथा निर्देशक नीता ढुंगानाले बाचाअनुसार फिल्म ‘पार्वती’को पहिलो दिनको कमाइ रसुवा बाढी पीडितको राहतका लागि सरकारलाई हस्तान्तरण गरेकी छन् ।

नीताले सोमबार अर्थमन्त्री स्वर्णिम वाग्लेलाई ११ लाख तीन हजार २७० रुपैयाँ बराबरको चेक हस्तान्तरण गरेकी हुन् । उनले प्रधानमन्त्री दैवीप्रकोष् उद्धार कोषका लागि उक्त चेक अर्थमन्त्रीलाई हस्तान्तरण गरेकी हुन् ।

फिल्मको पहिलो दिनको कमाइबाट निर्माताको अंशमा आएको सम्पूर्ण रकम उनले सरकारलाई दिएकी हुन् ।

यो फिल्म रसुवामा बाढी आएको पर्सीपल्ट भदौ १२ देखि प्रदर्शनमा आएको थियो । उनले बाढी पश्चात ‘पार्वती’को पहिलो दिनको व्यापार राहत स्वरुप उपलब्ध गराउने प्रतिबद्धता जनाएकी थिइन् ।

उनले त्यही प्रतिबद्धता पूरा गरेकी हुन् ।

यही फिल्मबाट नीताले निर्देशनमा डेब्यू गरेकी छन् । फिल्ममा उनी र बाल गायक अशोक दर्जी शीर्ष भूमिकामा छन् ।