नयाँदिल्ली– भारतीय रक्षामन्त्री राजनाथ सिंहले नयाँदिल्लीस्थित नेपाली दूतावास पुगेर २६ अगस्टमा आएको विनाशकारी बाढीमा ज्यान गुमाउनेहरूप्रति समवेदना व्यक्त गरेका छन्।

सिंहले दूतावासमा राखिएको शोक पुस्तिकामा हस्ताक्षर गर्दै भारत सरकार र भारतीय जनताका तर्फबाट नेपालका जनता तथा सरकारप्रति गहिरो समवेदना व्यक्त गरेका हुन्।

उनले २६ अगस्ट २०२६ मा आएको आकस्मिक बाढीका कारण ठूलो जनधनको क्षति भएको उल्लेख गर्दै यस प्राकृतिक विपत्तिबाट नेपाली नागरिकसँगै भारतीय नागरिकसहित विभिन्न देशका विदेशी नागरिकसमेत प्रभावित भएको बताएका छन्।

उनले विपत्तिमा ज्यान गुमाउनेका परिवारप्रति सहानुभूति व्यक्त गर्दै घाइतेहरूको शीघ्र स्वास्थ्यलाभको कामना गरेका छन्।

सिंहले भारत र नेपालबीचको सम्बन्धलाई नजिकको मित्रता र साझेदारीका रूपमा उल्लेख गर्दै भारत सधैं नेपालको सुख दुःखको साथीका रूपमा उभिँदै आएको बताएका छन्।

‘यस कठिन समयमा पनि हामी नेपाली दाजुभाइ तथा दिदीबहिनीसँग काँधमा काँध मिलाएर उभिएका छौँ,’ सिंहले लेखेका छन्।

उनले नेपालले गरिरहेको खोज तथा उद्धार र पुनर्स्थापनाका प्रयासमा भारतले सहयोग जारी राख्ने प्रतिबद्धतासमेत व्यक्त गरेका छन्।