काठमाडौं- राष्ट्रिय स्वतन्त्र पार्टीका सभापति रवि लामिछानेले आफ्नो दलका सांसदहरूलाई बुधबार आएको बाढी प्रभावित रसुवा र नुवाकोटमा टुरिस्ट बनेर नघुम्न निर्देशन दिएका छन्।

सरकारी हेलिकप्टरसमेत चढेर रास्वपाका सांसदहरू टुरिस्टका रुपमा बाढीप्रभावित क्षेत्र पुगिरहेपछि रविले कडा निर्देशन दिएका हुन्।

सांसदहरू रिमा विश्वकर्मा, सागर ढकाल, बदन भण्डारी र ज्वाला संग्रौलाहरू टुरिस्टको शैलीमा बाढी प्रभावित क्षेत्रमा घुमेपछि चर्को आलोचना भएको थियो ।

उनीहरूको गतिविधिलाई लिएर सामाजिक सञ्जालमा चर्को विरोध भएको अवस्थामा आइतबार केन्द्रीय कार्यालयमा बाढीपछिको अवस्थाबारे ब्रिफिङ लिँदै रविले कडा निर्देशन दिएका हुन् ।

लामिछानेले अत्यावश्यक कामबाहेक बाढी प्रभावित क्षेत्रमा नबस्न र नघुम्न सांसदहरूलाई निर्देशन दिएका हुन् । उनले आइतबार वनस्थलीस्थित कार्यालयमा नेताहरू र सांसदसँग बिफ्रिङ लिँदै यस्तो निर्देशन दिएका एकजना नेताले बताए।

देशकै इतिहासको ठूलो विपत्ति परेको अवस्थामा टुरिस्टको शैलीमा सुकुलोमुकिलो भएर, कालो चश्मासहित बाढी प्रभावित क्षेत्रमा घुमेको देखेपछि पीडितहरूलेसमेत प्रश्न गरिरहेका थिए ।