काठमाडौं । रसुवा बाढीमा बगेर बेपत्तामध्ये चितवनमा मात्र हालसम्म कुल १३५ वटा शवहरू संकलन भएका छन् ।

तीमध्ये पहिचान प्रक्रिया सहज बनाउन भरतपुरस्थित औद्योगिक व्यवसाय विकास प्रतिष्ठान हलमा स्थापना गरिएको अस्थायी पहिचान कक्षमा शवहरू ल्याइएको छ ।

चितवनका एसपी रामेश्वर पौडेलका अनुसार शवलाई व्यवस्थित रूपमा राख्न ७ वटा डेकर बनाइएको छ । शवको सुरक्षाका लागि रातिको समयमा सुरक्षाकर्मी खटिनेछन् ।

शव माइनस डिग्रीको तापक्रम कायम गरेर राखिनेछ । चिकित्सकहरूले शवहरूलाई सफा गरी महिला, पुरुष र उमेर छुट्टाएर स्पष्ट फोटोहरू खिचेका छन् ।

यी फोटोहरू भोलि बिहान ७:०० बजेदेखि सोही उद्योग संघको ठूलो हलभित्र राखिने एसपी पौडेलले जानकारी दिए ।

शव पहिचानका लागि आउने पीडित परिवारका लागि चितवन प्रशासनले निःशुल्क होटलमा बस्ने व्यवस्था समेत मिलाएको छ ।