काठमाडौं– बुधबार रसुवागढीस्थित भोटेकोसीमा आएको भीषण बाढीपछि देश यतिबेला शोकमग्न छ। बाढीको भयावह अवस्थाका कारण रसुवा, नुवाकोट, धादिङ र चितवन अस्तव्यस्त भएका छन्।

अहिलेसम्म तीन सयभन्दा बढीको निधन भइसकेको छ। त्यसको दोब्बर संख्यामा मानिसहरू बेपत्ता छन्।

तर यो भयावह अवस्थामा पनि मानवीय संवेदनशीलता गुमाउनेको जमात ठूलो छ। कोही लाशबाटै सुनका गहना थुतिरहेका छन्।

कोही उद्धार र राहतमा खट्नुपर्ने बेला कन्टेन्टको खोजीमा लागेका छन् । मानवीयतासमेत भुलेर गरिने यस्ता हर्कतलाई आजको कार्टुनले प्रहार गर्ने कोसिस गरेको छ।

सामाजिक सञ्जालमा हेर्दा जताजतै बाढीपहिरोका हृदयविदारक तस्बिर, भिडियो र अन्य विवरण पोस्ट वा रि-पोस्ट भइरहेका छन् । हजारौँको घर, धनसम्पत्तिसहित उठिबास भएका बेला गुमाइएको मानवीय संवेदनालाई लिएर यो कार्टुनमार्फत् कटाक्ष गरिएको हो ।

सूचना तथा सञ्चार मन्त्रालयले यस्ता सामग्री पोस्ट नगर्न भनिसकेको छ। यस्ता सामग्रीले विपद्मा ज्यान गुमाएका व्यक्तिका आफन्त तथा परिवारजनलाई थप पीडा पुग्न सक्ने कुरा भुलेको प्रति कार्टुनले व्यंग्य गरेको छ।