काठमाडौं- भोटेकोसी नदीमा बुधबार आएको विनाशकारी बाढीपछि सिन्धुपाल्चोकका करिब २ सय ४४ जना हराइरहेका छन्।

सवारी चालक, कर्मचारी, मजदुर, व्यवसायी र घुम्न गएकाहरु गरी करिब २ सय ४४ जना जति हराइरहेको सिन्धुपाल्चोक क्षेत्र नम्बर २ बाट निर्वाचित प्रतिनिधिसभा सदस्य युवराज दुलालले बताए ।

उनका अनुसार बुधबार बिहान बाढी गएपछि उनीहरू कोही पनि सम्पर्कमा आएका छैनन् । यसैबीच दुलाल र पूर्वप्रतिनिधिसभा सदस्य एवम् नेकपा युवा नेता माधव सापकोटा हराइरहेकाको अवस्था बुझ्न प्रभावित क्षेत्रतर्फ गएका छन् ।

आफूहरू नुवाकोट हुँदै वैकल्पिक मार्ग प्रयोग गरेर रसुवासम्म पुग्ने योजनासहित हिँडेको दुलालले बताए ।

‘हाम्रो जिल्लाका करिब २ सय ४४ जनाजति बाढीपछि सम्पर्कबाहिर छन्’, उनले भने, ‘गाडी जाने ठाउँसम्म गाडीमा र त्यसपछि हिँडेरै प्रभावित क्षेत्रमा पुग्छौं ।’

स्थानीय दुलालले सुरक्षा संयन्त्र र पार्टी कमिटीसँगको समन्वयमा हराइरहेकाहरुको खोजबिन गर्ने जानकारी दिए ।